الساعة الخامسة فجر الاثنين او الثلاثاء او الخميس، لا فرق.
الطقس بارد، النور خافت، بعض الهواء في الخارج ينـثر اوراق الخريف المبعثرة في كل مكان.
المكان: منزل النائب ايلي سكاف. ومنزل النائب ميشال فرعون.

اللباس: روب دو شامبر نبيذي لسكاف وكحلي لفرعون.
المشهد الاول: سكاف يتمشّى في صالون الدار ويداه في جيوب الروب؛ يفرك فكه بيده اليسرى وينادي الخادم : قوم من النوم عملّي قهوة (صارخاً) بسرعة!
الخادم يصحو مذعوراً يرتدي سرواله سريعاً ويهرول الى المطبخ.

إيلي: وَلَـو هيك صارت؟ بكلّف ميشال صحافية من النهار تتسب فيي؟! ولَوَ شو عم بعمل معركة واترلو؟
(يمسك الخليوي بعصبية ويتصل بمستشاره الاعلامي)
... صارخاً: وينك ؟ شرّف هلّق  لهون، بدي بيان إمسح الارض فيه وردّ علي وعلى عيلتو وضوّي على كل مشاكلو ببيروت مع بيت الصحناوي... وزدلي إنّـو زلمة قريطم... هلق تعا فوراً!

المشهد الثاني: فرعون يتمشى في صالون منزله ويداه في جيوب الروب الكحلي. نفس الصرخة بالخادم (على فكرة خادم فرعون هو ابن خالة خادم سكاف)
ميشال: والله لإمسح الارض فيه. وخلّي يعرف انو ولو كان من عيلة كريمة لكنو بهدل عيلتو. واحد مَوتور ومش عارف شو بدو يقول.
وكأنه سمع ميشال عبر الـ(télépathie) إيلي: واحد متلك مَوتور طبيعي تخسر المعركة، ما جماعتي وحلفائي على لايحتك يا زكي... هاها(ضاحكاً)
يستمرّ المشي في الصالونات المتواجهة حتى شروق الشمس، وتستمر الردود على صفحات "النهار" وفي الليل... لكن أصحاب النوايا الطيبة من البسطاء الذين شاركوا في أعمال المجلس الاعلى للطائفة (على حدّ علمي انو اهداف المجلس لا تشبه ما يتصارعان عليه)، لكن اصحاب هذه النوايا يعرفون أن لا 14 آذار ولا 8 آذار تفيد في معادلتها ما يحتاجه الكاثوليك؛
ولا صراع سكاف-فرعون يجدي نفعاً في معركة الحاجة الى مسكن، والضرورة الى مدرسة، والعمل لاجل الحصول على عمل، في بلد بلا عمل وطائفة ومجلس أعلى على ما يبدو ... بلا أمل!
يا عيب الشوم!

المشهد الثالث: غرفة الخدم، الساعة الخامسة ب.ظ، الاضاءة: ظلام دامس.
خادم يتصل بابن خالته ويقول بصوتٍ خافت: يا زلمي شو ما في غيرون بهالطايفة؟؟!
ابن خالتو وبصوت خافت أيضاً: أكيد طالما هالقد صوتك... واطي!

ملحم الرياشي